الثلاثى المرح «البنات»: هنا مقص وهنا مقص هنا عرايس بتترص
وعرايس متنقية... كل صبية وصبية زى حورية عربية
ثلاثى النغم «الرجال»: زى حورية عربية
البنات: رمش مكحل ربانى ... خد فى ديل فستانى
والخطوة تصحى الأشواق على دق قلوب العشاق
تك تك دوم ... تك تك دوم
الرجال: هنا مقص وهنا مقص هنا عرايس بتترص
وقصادنا بيت المأذون.. والمأذون عاوز ينسون.. والينسون فى السخونية توبها شبكة وهدية.. ومهرها صرة فى منديل مية ومية برضو قليل
البنات: برضو قليل برضو قليل
الرجال: وإحنا يدوب اتخرجنا على الحلويين اتفرجنا
لسه لا شخللنا جيوبنا ولا عمرنا إلا قلوبنا
وقلوبنا بتقول: تك تك دوم.. تك تك دوم
البنات: تك تك دوم ... تك تك دوم
الرجال: هنا مقص وهنا مقص
البنات: .... ما نقوصش
الرجال: هنا عرايس بتترص
البنات: والعرسان ما بتترصش
الرجال: طب قولنا المهر أدبر
البنات: والعيشة كمان تدبر
الرجال: أولها عايزين شقة
البنات: عش اتنين فوق شجراية
الرجال: وتانيها نفرشها بكام
البنات: كنبة وقلة وكوباية
الرجال: وتلاتها
البنات: زى تانيها..الرجال: ورابعها
البنات: هنسويها
الرجال: دى ماهية على قد الحال
البنات: وإحنا كمان لينا ماهية
الرجال: سنة والتانية هيجوا عيال
البنات: ويا علاوة وترقية
الرجال: يعنى نقايس على المأذون
البنات: يبقى كلامكم كده موزون
الرجال: ديه قلوبنا بتقول: تك تك دوم.... تك تك دوم
البنات: وقلوبنا بتقول: دوم دوم تك.... دوم دوم تك
ليست هناك تعليقات:
إرسال تعليق
ضع تعليق وشاركنا بآرائك