بيقولوا التقل صنعة - محمد العزبى
كلمات: حسين السيد | الحان: نبيل عبد العزيز
بيقولوا التقل صنعة
قولتلهم كدابين
خدوا ايه اللى فاتونا
ظلمونا من سنين
لو روحتوا تسألوهم
تلاقيهم ندمانين
من يوم ما قابلت حبيبتى الحلوة
ست الحلوين
يا سلام ياولاد دى عليها
حنية مش على حد
المية من ايديها
تشربها تقول دى مورد
وعليها كلام يا جماله
بيخش القلب كده بحاله
لا تقول موال ولا عود ولا ناى
لو سمعوا البدر ياخد باله
من يوم ما قابلت حبيبتى الحلوة
ست الحلوين
عشاق الهجر قالولى
الحلو طريقه صعب
وعيونها هى قالولى
الحلو فى راحة القلب
وفرشت الارض لولى
من نظرة شوق على جمب
وصدق من قال يا اخواتى
مش كل جميل يتحب
يسلم يا جميل تسلم ليا
يا ابو قلب دهب وعيار مية
يا سلام يا ولاد
دى غلاوة يا ولاد
عايزلها ميزان جواهرجية
من يوم ما قابلت حبيبتى الحلوة
ست الحلوين
مساكين يا اهل المحبة
يا سايقين فى الدلال
الحب ده عشرة وصحبة
والود يزيده جمال
والتقل ياخدنا فى غربة
مليانة بحور وجبال
ياما عشت ليال طويلة
محروم من راحة البال
واهو ده اللى تعبنى وخلانى
دورت وحبيت من تانى
حب انما ايه بصيت فى عينيه
لقيت اللى فى قلبه على لسانى
من يوم ما قابلت حبيبتى الحلوة
ست الحلوين
- 1977 -
تابعنا على تويتر
ليست هناك تعليقات:
إرسال تعليق
ضع تعليق وشاركنا بآرائك